Премиерот Христијан Мицкоски изјави дека вкупната каматна стапка за заемот од договорот со Обединетото Кралство ќе биде помала од маргината од 4,5 проценти, објаснувајќи дека се користи кредитниот рејтинг на Обединетото Кралство, кој е трипати А, што е најдоброто што државата може да го добие на пазарот во моментов.
Мицкоски истакна дека ова е она што со сигурност може да го каже од досега договореното, потенцирајќи дека финансиските услови сè уште не се целосно усогласени и дека нема отворен дијалог со никого за деталите.
На прашањето дали вкупната каматна стапка ќе биде во рамките на тековните проекции за државата, кои се движат од 4,5 до 6,5 проценти, Мицкоски одговори дека вкупната каматна стапка би била пониска од оваа долна граница, повторувајќи дека сè уште немаат отворено таков дијалог со никого.
„Договорот е за стратешко партнерство меѓу Македонија и Обединетото Кралство и тој поминува во собраниска процедура“, рече Мицкоски.
„Во делот на финансиските аранжмани, ние имаме преговори со финансиски институции од таа земја и имаме од прилика структура колку би била каматната стапка за тој еден заем и би кажал дека е подоле од долната маргина што ја кажавте“, изјави Мицкоски, одговарајќи на новинарски прашања на прес-конференција за промоција на оперативниот план за вработување.
Но, Мицкоски нагласи: „Ние нема да одиме на директно потпишување договор со таа финансиска институција, туку Министерството за финансии, откако ќе добие барање за проект, ќе излезе на меѓународен пазар и ќе има конкурентен дијалог со 18-20 потенцијални кредитодаватели, меѓу кои и европските банки.“
„Оној што е подготвен да финансира вакви проекти, со одредена конкурентна каматна стапка, ќе биде избран“, додаде Мицкоски. „Не можеме од сега да знаеме дали таа финансиска институција со која преговаравме ќе биде најконкурентна. Таа ќе биде избрана само под услов да е најконкурентна, затоа не е дел од договорот, затоа што таа процедура допрва ќе се случува. И тоа ќе биде транспарентно и нема да биде скриено, нема да се носи со европско знаме и нема да биде класифицирано. Зарем мислите дека јас сум тука да дозволам држава да направи фаул или пак граѓаните да бидат ограбени? Напротив, ние добивме доверба за да ја развиваме“, изјави Мицкоски.
Финансиските услови сè уште не се докрај договорени, потенцираше Мицкоски, посочувајќи дека во случајот има петгодишен грејс период и првата фактура би доспеала на 1 јануари 2027 година и од тогаш ќе започне грејс периодот.
На прашањето дали договорот предвидува соработка во безбедноста и што тоа подразбира, Мицкоски одговори дека пред две недели на владина седница бил разгледан меморандум за разбирање меѓу Владата и британска компанија која е подготвена да инвестира во еден таков производствен капацитет меѓу 250-300 милиони евра, што годишно би носело од извоз околу половина милијарда евра.
„Но, имаме договор, кога ќе биде сето тоа финализирано, ќе застанеме повторно на прес и тоа ќе го кажеме“, изјави Мицкоски.
