Поминаа повеќе од еден век откако неколку млади луѓе во Солун ја запалија искрата на македонската револуционерна мисла.Но нивниот дух не остаре. Тој дух живее во секоја генерација што верува дека слободата не е подарок, туку одговорност. Живее во секој човек што не прифаќа неправда, во секој граѓанин што верува дека оваа земја заслужува повеќе, нагласи Мицкоски.
Зашто ВМРО не е само страница во историјата — тоа е корен, идеал и завет.
Организацијата што ја израсна оваа држава. Школата во која се научивме што значи да се биде чесен, да се биде храбар, да се биде свој, истакна премиерот Мицкоски во говорот.
Денес, тие погледи од портретите во музеите не нè гледаат со гордост ако ние не ја продолжиме нивната борба – борбата за достоинство, за правда, за македонско сонце што никогаш не заоѓа. Затоа, овој ден не е само спомен. Тој е и повик. Повик да бидеме подобри. Да бидеме народ што ќе ја гради својата иднина со иста решеност со која тие ја започнаа својата борба.Денес, нашата татковина не е веќе сон во туѓи книги — таа е држава со свое име, култура, обичаи, свој јазик, своја гордост и своја иднина. Но токму затоа, нашата должност е поголема.
Да ја чуваме таа држава од поделби, од омраза, од цинизам и апатија.
Да ја чуваме со љубов, со визија и со одговорност
ВМРО ни остави најголемото наследство — верата дека ништо не е невозможно кога народот е сполотен и обединет. Таа вера е темелот врз кој градиме нова Македонија — на знаење, на труд, на еднакви шанси и правда за секого.
И кога ќе градиме училишта, болници, фабрики и патишта — ние не градиме само институции, туку ја продолжуваме револуцијата, во мир, со дело, со ум и со срце. Секоја генерација има своја борба. Нивната беше за држава.
Мора оваа држава да биде место каде што ќе владее ред, почит, правда и достоинство. Место каде младите нема да заминуваат, туку ќе создаваат. Место каде што ќе се слуша македонскиот јазик со гордост, а не со страв.
И токму затоа, на овој свет ден, да си ветиме едни на други – дека нема да го заборавиме заветот на тие што ни ја подарија слободата. Дека ќе останеме исправени кога е најтешко, достојни кога е најлесно, и обединети кога некој ќе се обиде да нè раздели.
Да си ветиме дека ќе ја чуваме Македонија со истата љубов со која тие ја сонуваа.
И дека кога идните генерации ќе зборуваат за нас – ќе кажат дека оваа генерација не ја изневерила својата татковина.
Затоа денес, кога го чествуваме овој свет ден, да не зборуваме само за минатото, туку за иднината што сме должни заедно да ја изградиме. Да ја направиме Македонија држава со вредности, со ред и закон, со луѓе што верува во себе. Да изградиме земја каде младите ќе останат, каде секој труд ќе се наградува, каде што нико, ама буквално никој нема да биде заборавен.
Нашата генерација ја има истата задача што тие ја имаа – да ја брани Македонија, но на нов начин: со знаење, со интегритет, со мудрост и со визија.
Затоа што денес патриотизмот не се мери со зборови, туку со дела
Со секој мост што ќе го изградиме, со секое училиште што ќе го подигнеме, со секој живот што ќе го подобриме.
Така се продолжува делото на ВМРО. Така се покажува љубов кон Македонија.
Не со зборови што гласно одѕвонуваат, туку со дела што тивко траат.
Денес, кога го гледаме знамето како се вее, треба да знаеме дека тоа не е само парче ткаенина. Тоа е сведоштво за сите што паднаа за да ние стоиме исправени.
Тоа е завет што мора да го чуваме. И затоа, на овој 23 Октомври, да си ветиме едно на друго: дека нема да ја изневериме нивната жртва, дека нема да го изневериме нивниот сон. Да си ветиме дека ќе ја чуваме Македонија– во нашите мисли, во нашите постапки, во нашите срца. И кога некој ќе праша што е ВМРО, да можеме да одговориме со гордост:
тоа сме ние – народот што не се покори, народот што ја љуби својата земја повеќе од животот.
Да живее идејата што не згаснува!
Зашто идејата на ВМРО е вечна – таа не живее во книгите, туку во нашите дела, во нашите соништа, во нашата љубов кон оваа земја.
Да живее ВМРО – вечен симбол на непокорот и достоинството!
Да живее Македонија – држава изградена со вера, со крв и со сон!
Да живее народот кој никогаш не се покори,
и кој знае дека најубавите страници од нашата историја – сè уште не се напишани!
