Премиерот Христијан Мицкоски денеска го откри најтешкиот ден во неговиот живот – трагичниот 16 март, кога во дискотеката „Пулс“ во Кочани животот го загубија 62 млади луѓе.
Говорејќи на Самитот „Македонија 2025“, Мицкоски се наврати на таа мрачна ноќ, која, како што рече, засекогаш ќе ја памети.
– Беше околу 3:30 наутро кога некој затропа на вратата од мојот дом. Пред мене стоеше човек од обезбедувањето на министерот за внатрешни работи Панче Тошковски. Не знаев што се случува, бидејќи телефонот не го погледнав додека спиев. Кога ја видов пораката, веднаш се мобилизирав и заедно со мојот тим се упативме кон Кочани – раскажа премиерот.
Во градот веќе пристигнал министерот Тошковски, а Мицкоски заедно со него заминал во полициската станица.
Сепак, вистинската тежина дошла со носењето одлуки – особено кога почнала да пристигнува помош од странство.
– Тоа беа моменти кога требаше да се одлучи брзо, но мудро. Немаме совршени односи со дел од соседите, особено со еден, и кога ќе пристигне понуда за помош, веднаш размислувате и за политичките и за човечките последици – изјави Мицкоски.
Според него, медицинските експерти биле јасни – тешко повредените не смеат да се транспортираат, но во исто време предупредиле дека доколку останат, голем број нема да преживеат.
– Ми рекоа дека првите 72 часа се клучни. Немав време за долго размислување. За неколку секунди ја прифатив понудената помош и го презедов целиот ризик на себе – нагласи премиерот.
Првите 50 пациенти биле транспортирани веднаш, а потоа, како што рече, почнала да стигнува поддршка и од други земји.
