Претседателот на Сојузот на синдикати на Македонија, Слободан Трендафилов, денеска обвини дека е следен тој лично, а што е најлошо, и неговите деца. Тој ја посочи пратеничката на ВМРО-ДПМНЕ, Дафина Стојаноска, која објавила видео на кое се гледа Трендафилов и неговите деца, за кое вели дека покажува оти власта користи секакви средства, дури и незаконски, за да го оцрни него и заложбите на ССМ за зголемување на минималната плата.
Видеото било објавено вчера, спроти протестот, односно блокадата на Собранието која ја организираше ССМ како дел од борбата за зголемување на работничките плати. На снимката се гледаат Трендафилов и неговите две деца (чии лица се делумно затемнети), како се упатуваат и влегуваат во возило, што е проследено со коментар на Стојаноска „не слушајте што зборува, туку гледајте го како се однесува… Трендафилов, службеното возило на ССМ и приватните обврски…“
Трендафилов, видно вознемирен, но не и исплашен, денеска на прес-конференција во ССМ, рече дека него може да го снимаат колку што сакаат, но е недопустливо да се злоупотребуваат децата со цел власта да го спречи да се бори за работничките права.
„Може да ме уценуваат, да ме напаѓаат и да ми се закануваат. Нема да потклекнам и нема да се предадам сѐ додека не се предадат тие и не ги зголемат работничките плати“, рече Трендафилов додавајќи дека сака да зборува, како што рече „за монструмите“ за „оние кои не се во детските кревети, туку седат во пратеничките клупи, кои ги гледате во кафулиња, ги среќавате на улица, кои ги имате во партијата. Кои снимаат малолетни деца“.
Тој притоа објасни дека во Велес, каде што живее со семејството и каде што учат неговите две деца, била направена снимка од него, но и од нив и други ученици, што го посочи како класичен пример за кривично дело, но и доказ дека е следен од службите.
„Монструмите не се само не телевизија. Тие се покрај нас“, рече Трендафилов при што ги повика Министерството за внатрешни работи, министерот за внатрешни работи и Обвинителството веднаш да преземат мерки против пратеничката Дафина Стојаноска.
Трендафилов обвини дека Стојаноска ги објавила неговите малолетни деца за да може сите да ги оцрнуваат и на таков начин да го уценуваат, мислејќи дека ако го следат него преку децата, ќе му направат штета и ќе го замолчат.
„Се случија големи катастрофи со деца. Не сакам да верувам дека целта им била тоа“, рече Трендафилов, додавајќи дека наместо премиерот да дава изјава дека „ова е само почеток“, со заканите по неговите деца и по неговото семејство, ќе дадел оставка или најмалку, ќе ја разрешел Стојаноска. Со слични оцени тој се осврна и на Владата, за која рече дека во „нормални држави“ за ваква работа би паднала, истовремено повикувајќи го претседателот на Собранието да поведе постапка за одземање на пратеничкиот имунитет на Стојаноска.
Трендафилов им се заблагодари јавно на инспекторите од МВР кои во текот на вчерашниот ден ги преземале сите мерки за кривичен прогон и ги обезбедиле сите потребни докази.
„За жал, тоа не е само еден ден, утрото кога доаѓавме на протестот да ги блокираме пратениците во Собранието, туку е во континуитет цела измината година“, вели Трендафилов, при што постави прашање до министерот Тошковски „дали службите го следат претседателот на Сојузот на синдикатите и дали службите му ги снимаат децата?“
Тој побара одговорните веднаш да бидат уапсени, дотолку повеќе што училиштето и патеката по која биле снимани имала надзорни камери.
Исто така го повика јавниот обвинител веднаш да покаже дека „правдата е еднаква за сите“.
„Објавувањето на малолетни деца, сакајќи да ми се наштети мене е злоупотреба на децата, нешто што не е дозволено никаде во светот“, рече Трендафилов, додавајќи дека за случајот ќе бидат известени сите амбасади, Делегацијата на ЕУ, братските синдикати и Меѓународната и Европската конфедерација на синдикати и Меѓународната организација на трудот.
„Денеска прогон на синдикалци затоа што се борат за зголемување на платите има само во Белорусија и Мјанмар“, рече Трендафилов.
Тој исто така рече дека на видео снимката која ја објави Стојаноска не се само неговите деца, туку и деца на други родители кои одат на училиште и во училишниот двор, за што бара министерката за образование да се огради од она што го направила пратеничката затоа што се случува во двор на училиште во кое учат малолетни деца.
„Ако децата не ни се безбедни затоа што бараме зголемување на работничките плати, прашуваме кој е следен и што планираат следно да направат и дали е ова закана по животот и здравјето на нашите најблиски затоа што се бориме, а не им се молиме“, рече Трендафилов.
