Министерот за надворешни работи и надворешна трговија, Тимчо Муцунски, остро реагираше на, како што рече, активната пропаганда во Европскиот парламент поддржана од официјална Софија за „модернизација“ на македонскиот национален идентитет.
– Срамно е што земја членка на ЕУ се обидува да го редефинира нашиот идентитет. Ние имаме право да го почитуваме, чуваме и надградуваме нашиот национален идентитет. Жалиме што земји членки на Унијата имаат антиевропски позиции – изјави Муцунски.
Тој потенцира дека земјава останува посветена на реформите и европскиот пат, но без компромиси кога станува збор за идентитетските прашања.
– Нашиот напредок сѐ почесто не се мери според објективни критериуми, туку е предмет на билатерални условувања кои немаат врска со европските вредности. Апсолутно нема да прифатиме ништо што задира во нашиот идентитет – нагласи Муцунски, одговарајќи на новинарски прашања по бизнис форумот Македонија – Италија во Скопје.
Тој додаде дека државата нема европратеници кои директно може да се борат за интересите на земјата, што ја прави работата потешка, за разлика од соседна Бугарија.
Во однос на претстојниот извештај за напредокот, Муцунски очекува дека ќе преовлада свеста за значењето на процесот и ќе се препознае дека надворешната политика се води исклучиво низ призмата на националниот интерес.
Говорејќи за Самитот на лидерите на Западен Балкан и ЕУ, што се одржа вчера во Скопје, тој оцени дека е еден од најуспешните досега, со јасен фокус на спроведувањето на Планот за раст и продлабочување на регионалната соработка.
– Работиме на конкретни иницијативи што ќе го подобрат квалитетот на животот и економијата, но истовремено цврсто стоиме на нашите национални позиции и никогаш нема да дозволиме компромис за идентитетот – заклучи Муцунски.
