Реваншот Алкалоид – АЕК во ЕХФ Европскиот куп нема да се одигра, откако грчкиот тим одлучи да не истрча на теренот во СЦ „Борис Трајковски“.
Се чека реакција на надлежните од ЕХФ за големиот скандал предизвикан од гостите во СЦ „Борис Трајковски“.
Ракометарите на АЕК одбија да го почнат натпреварот со Алкалоид додека нивните навивачи не дојдат во салата. На официјалното претставување пред реваншот од ЕХФ Европскиот куп, играчите на грчкиот тим беа до теренот, но не истрчаа, бидејќи ги немаше нивните навивачи.
Наводно на македонско-грчката граница биле пуштени само 200 навивачи, а исто толку биле вратен назад.
АЕК бараше одложување на реваншот.
Спортскиот портал „Еноси“, што е специјализиран за вести поврзани со екипите на АЕК во сите спортови, нешто помалку од еден час пред натпреварот, објави дека неколку автобуси со навивачи на АЕК се задржани на граничниот премин и не им е дозволен влез и дека „раководството на АЕК, на состанок со ЕХФ, јасно стави до знаење дека тимот нема да излезе на терен, ако на навивачите не им биде дозволено да ја преминат границата.
Натпреварот требаше да почне во 20:30 часот.
На првиот меч минатата недела во Атина, Алкалоид победи со 29:25.
