Најбогатите 1% од луѓето во светот го зголемиле своето богатство за повеќе од 33,9 трилиони долари во реални услови од 2015-та година, според новиот извештај на меѓународната невладина организација „Oxfam“.
Тоа е повеќе од доволно за да се елиминира глобалната сиромаштија 22 пати (пресметката се базира на највисоката линија на сиромаштија на Светската банка од 8,30 долари дневно и 3,7 милијарди луѓе кои живеат под линијата на сиромаштија). Друг начин да се каже е дека вкупниот износ е повеќе од доволен за целосно да се стави крај на сиромаштијата за 22 години.
Богатството на најбогатите 3.000 милијардери во светот се зголемило за 6,5 трилиони долари во реални услови од 2015-та година и сега е еднакво на 14,6% од глобалниот бруто домашен производ (БДП).
Извештајот на „Oxfam“ се презентираше денеска пред четвртата Меѓународна конференција за финансирање на развојот на 30-ти јуни, чиј домаќин е шпанскиот град Севиља.
Податоците доаѓаат во време на растечки повици за данок на богатство врз меѓународната елита.
Според глобално истражување во повеќе од 70 земји, 9 од 10 луѓе го поддржуваат воведувањето даноци врз ултрабогатите како средство за финансирање на јавните услуги и борба против климатските промени, исто така соопшти „Oxfam“.
Анализата на организацијата покажува дека помеѓу 1995-та и 2023-та година, приватното богатство во светот пораснало за 342 трилиони долари – 8 пати повеќе од глобалното јавно богатство, кое пораснало за само 44 трилиони долари во текот на периодот. Како дел од вкупното богатство, јавното богатство всушност се намалило помеѓу 1995-та и 2023-та година.
Oxfam“ ги повикува владите ширум светот да се обединат околу политичките и програмските предлози за справување со екстремната нееднаквост и да го трансформираат системот за финансирање на развојот.
