Најмалку единаесет жители загинаа во пожар во општинскиот Пензионерски дом во босанскиот град Тузла, како што објави босанскиот новински портал „klix.ba“, повикувајќи се на градоначалникот на градот, Зијад Лугавиќ. Триесет и пет други лица, според извештајот, се пренесени на лекување во болница, од кои тројца се во критична состојба.
Пожарот избувнал на седмиот кат од деветкатната зграда во средата вечерта од причини кои сè уште не се јасни. Според извештаите, на катот биле сместени пациенти кои биле неподвижни и на кои им била потребна нега, некои со тешка деменција и рак. Меѓу повредените има и пожарникари, полицајци, болничари и персонал во домот за стари лица.
Домот за стари лица во Тузла е изграден во 1980-тите, за време на социјалистичка Југославија. Високата зграда, во архитектонски стил од тоа време, доминира во градскиот пејзаж на Тузла, поранешен индустриски центар во северна Босна и Херцеговина.
Сепак, жителите на домот и нивните роднини, како и некои политичари во Тузла, со години ги критикуваат условите во домот за стари лица, кои ги сметаат за неприфатливи. Меѓу покренатите прашања се проблеми како што се влага, лоша храна и груб третман на жителите од страна на персоналот, како што објави „klix.ba“. Друга спорна точка е фактот дека особено тешко болни пациенти се сместени на горните катови.
Според извештаите, градските власти не се осврнале на жалбите. На почетокот на годината, се вели дека раководството на домот за стари лица дури ги зголемило цените за сместување и нега до 30 проценти.
