Јапонец осуден за четирикратно убиство и кој поминал 46 години чекајќи смртна казна, ќе добие отштета од 1,4 милиони долари, потврди судски службеник.
Надоместокот изнесува околу 83 долари за секој ден што Ивао Хакамада го поминал во затвор.
Хакамада беше осуден на смрт во 1968 година за убиство на неговиот шеф, неговата сопруга и нивните две деца во 1966 година.
Поранешниот боксер, кој сега има 89 години, беше ослободен во 2024 година, откако неговата сестра, заедно со други, со децении водеше кампања за негово ослободување, пишува Гардијан.
Судот, во одлуката донесена вчера, пресуди дека тој има право на компензација.
Во септември истиот суд на повторното судење одлучи дека Хакамада не е виновен и дека полицијата манипулирала со доказите.
Според Судот, Хакамада бил подложен на „нехумани сослушувања со цел да се изнуди признание“.
Локалните медиуми јавуваат дека ова е рекордна сума на обештетување од овој тип во Јапонија.
Сепак, неговиот адвокатски тим вели дека парите не можат да ја надоместат штетата што ја претрпел.
Годините поминати во притвор, со постојана закана од егзекуција, сериозно му наштетиле на менталното здравје на Хакамада, велат неговите адвокати, опишувајќи го како личност која „живее во свет на фантазии“.
Хакамада беше петтиот осуденик на смрт на кого му беше одобрено повторно судење во повоената историја на Јапонија.
Сите четири претходни случаи исто така завршија со ослободителни пресуди.
