СДСМ остро реагираше по пресудите во предметот „Талир 2“, со кои поранешниот премиер Никола Груевски беше ослободен од обвинението, а конфискацијата на седиштето на ВМРО-ДПМНЕ, познато како „Белата палата“, беше укината.
Од опозициската партија оценуваат дека одлуката претставува доказ дека, како што велат, судството и обвинителството работат во корист на власта и овозможуваат поништување на претходните судски постапки против поранешни функционери
„Граѓаните гледаат како судството и обвинителството под контрола на Мицкоски го чистат Никола Груевски од одговорност за предметот ‘Талир 2’ и го одмрзнуваат криминалниот имот на ВМРО. По осум години, ‘Белата палата’, вредна 14 милиони евра, како и останатиот партиски имот во вредност од околу два милиони евра, повторно се во рацете на ВМРО-ДПМНЕ“, соопштија од СДСМ.
Партијата тврди дека поранешниот премиер, кој е правосилно осуден во други предмети и се наоѓа во Унгарија, и понатаму ја избегнува казната благодарение на, како што велат, однесувањето на актуелната власт.
Според СДСМ, Владата предводена од премиерот Христијан Мицкоски не презела доволно активности за екстрадиција на Груевски.
Во реакцијата се оценува дека ослободителната пресуда во предметот „Талир 2“ е уште еден пример дека, според нив, правосудниот систем не функционира независно.
„Мицкоски му овозможува на својот ментор Никола Груевски да ја избегне правдата за ‘Талир 2’. Ова е свесна заштита на Никола Груевски, најголемиот симбол на криминалот и корупцијата во Македонија“, наведуваат од СДСМ.
Од партијата додаваат дека поранешниот премиер и натаму живее во Унгарија без да се соочи со одговорност за судските постапки што се водат против него во земјава.
„Сега Груевски – човекот кој избега во Унгарија – продолжува да ужива без да се соочи со одговорност, а тоа е можно само поради Христијан Мицкоски“, стои во реакцијата.
На крајот од соопштението, СДСМ порачува дека, според нив, „вистината излегува на виделина“ и дека очекуваат да дојде „времето на правдата и одговорноста“.
Претходно, судот донесе одлука со која Никола Груевски беше ослободен од обвинението во предметот „Талир 2“, а беше укината и мерката за конфискација на седиштето на ВМРО-ДПМНЕ, познато како „Белата палата“. Одлуката предизвика реакции во јавноста и меѓу политичките парти
