Данскиот фармацевтски гигант „Ново Нордиск“, производител на популарниот лек за дијабетес и слабеење Оземпик, најави дека ќе отпушти 9.000 вработени, од кои 5.000 во своите фабрики и канцеларии во Данска.
Со ова, компанијата намалува околу 11,5 отсто од вкупната работна сила од 78.400 луѓе во светот.
„Секогаш е тешко да се разделиме со талентирани и вредни колеги, но убедени сме дека ова е вистинскиот потег за долгорочниот успех на ‘Ново Нордиск’“, изјави извршниот директор Мајк Доустдар.
Тој нагласи дека со „реорганизацијата на ресурсите“ компанијата ќе може да ги насочи инвестициите кон одржлив раст и идни иновации, особено во третманите за хронични болести како дијабетес и дебелина.
Ова е една од првите големи одлуки на Доустдар, кој годинава го наследи Ларс Фруергорд Јоргенсен, под чија осумгодишна раководна палка „Ново Нордиск“ стана највредната компанија во Европа.
Но, акциите на фирмата паднаа минатата година поради зголемена конкуренција на пазарот за лекови против дебелина, пред сè од американската компанија „Ели Лили“ со нивниот лек Моуњаро, како и поради разочарувачки резултати од клиничките испитувања за новата генерација терапии.
Компанијата соопшти дека отпуштањата ќе предизвикаат еднократен трошок од околу 8 милијарди дански круни (околу 1,07 милијарди евра). Според новите прогнози, годишниот оперативен профит ќе порасне за 4 до 10 проценти, што е помалку од првичните очекувања од 10 до 16 проценти.
