Нов хаос во Шпанија, бројни возови и линии блокирани по кражба на кабли: Ова е сериозна саботажа

Железничкиот сообраќај во Шпанија влезе втор ден на хаос откако беа украдени кабли на линијата помеѓу Мадрид и Севиља, што доведе до големи доцнења и во недела и во понеделник.

Според соопштението на шпанските железници, инцидентот погодил повеќе од 10.000 патници на 30 железнички линии.

За кражбата на каблите зборуваше и министерот за транспорт на Шпанија, Оскар Пуенте, кој рече дека кражбата се случила на четири локации, сите во покраината Толедо.

„Ова е сериозен чин на саботажа и влијанието врз возовите ќе биде многу сериозно. Цивилната гарда ги истражува настаните“, рече тој.

Шпанската компанија за јавен превоз „Адиф“ изјави дека сите работници работат на решавање на проблемот.

Hemos sufrido un acto de grave sabotaje en la línea de alta velocidad Madrid Sevilla. 4 robos de cable en puntos distintos en un radio de 10 km. Puntos Kilométricos 92-850, 93-600, 101-400 y 102-200. Son los sistemas de seguridad de la línea. La afectación a los trenes que aún… pic.twitter.com/rfUpBFoiZR

— Oscar Puente (@oscar_puente_) May 4, 2025

Извори од Управата за железничка инфраструктура за агенцијата ЕФЕ изјавија дека кражбата е откриена во 17:45 часот во неделата и дека се проценува дека се украдени околу 300 метри кабел во радиус од 10 километри.

„Иако беа украдени 300 метри кабел, имаше и други помали кражби на различни точки по должината на линијата. Ова предизвика сериозна штета на безбедносните системи“, рекоа тие.

Инцидентот се случил само неколку часа пред почетокот на Севиљскиот саем, со традиционалното палење на светлата, и среде луѓето што се враќале од првомајските празници.

Покрај овие две железнички линии, во текот на неделата беа погодени и други средни и долги правци што ја поврзуваат Андалузија. Претседателот на Андалузија, Морено Бонила, побара од владата да обезбеди алтернативни начини за да се стигне до главниот град на Андалузија.

Хаосот на железничките линии низ Шпанија доаѓа само неколку дена откако земјата се соочи со прекин на електричната енергија што доведе до целосен застој во железничките активности речиси цел ден.