Регулаторната комисија за енергетика, водни услуги и услуги за управување со комунален отпад (РКЕ) донесе нова одлука со која од полноќ значително се зголемуваат цените на нафтените деривати. Во просек, малопродажните цени ќе бидат повисоки за 5,88 проценти во однос на претходната одлука од 13 јули.
Најголемо поскапување ќе има кај дизелот, чија цена се зголемува за шест денари по литар и од 21 јули ќе се продава по 94 денари за литар.
Бензините ЕУРОСУПЕР БС-95 и ЕУРОСУПЕР БС-98 поскапуваат за по три денари. Така, ЕУРОСУПЕР БС-95 ќе чини 90 денари за литар, додека ЕУРОСУПЕР БС-98 ќе се продава по 92 денари за литар.
Поскапува и екстра лесното масло за домаќинство, чија цена се зголемува за седум денари и ќе изнесува 93 денари за литар.
Новата цена на мазутот М-1 НС ќе биде 45,373 денари за килограм, што претставува зголемување од 3,205 денари.
Од РКЕ информираат дека зголемувањето е резултат на растот на референтните цени на светските пазари. Во споредба со претходната пресметка, бензините поскапеле за 9,003 проценти, дизелот за 14,963 проценти, екстра лесното масло за 13,200 проценти, а мазутот за 10,686 проценти. Во пресметката е земена предвид и Одлуката на Владата за намалени акцизи – за еден денар по литар кај бензините и за два денари по литар кај дизелот.
Новите максимални малопродажни цени ќе важат од 21 јули 2026 година во 00:01 часот:
* ЕУРОСУПЕР БС-95 – 90 денари/литар
* ЕУРОСУПЕР БС-98 – 92 денари/литар
* ЕУРОДИЗЕЛ БС (Д-Е V) – 94 денари/литар
* Екстра лесно масло за домаќинство (ЕЛ-1) – 93 денари/литар
* Мазут М-1 НС – 45,373 денари/килограм
РКЕ потсетува дека станува збор за максимално дозволени малопродажни цени, а трговците можат да ги продаваат нафтените деривати и по пониски цени од утврдените.
