Премиерите на Унгарија и Словачка, Виктор Орбан и Роберт Фицо, одржаа заеднички говори по повод 130-годишнината од инаугурацијата на мостот „Марија Валерија“, кој ги поврзува унгарскиот град Естергом и словачкиот Штурово.
Двајцата лидери, кои се сметаат за гласови кои отстапуваат во Европската Унија поради нивниот отпор кон прекинување на врските со Москва, ги искористија своите обраќања за да упатат остри критики кон Брисел.
Премиерот на Словачка, Роберт Фицо, истакна дека и покрај тоа што многумина би сакале да видат несогласувања меѓу лидерите на двете земји, тие се посветени на зајакнување на словачко-унгарските односи.
–Дојдов меѓу нормални, добри луѓе, рече Фицо, додавајќи дека ова е особено значајна прилика со оглед на лагите и омразата со кои „нашите противници нѐ напаѓаат“.
–Сакам да ја градам Словачка на ист начин како што Виктор Орбан ја гради Унгарија, изјави Фицо. Тој посочи дека го споделува ставот на Орбан дека единствено решение за надворешните напади е националниот суверенитет, кој треба да биде лајтмотив во секојдневната работа на политичарите кои имаат за цел да ѝ служат на својата нација.
Фицо ги спомна и неодамнешните амандмани на словачкиот устав, кои бракот го дефинираат како заедница меѓу маж и жена, „затоа што ова е нормално“. Тој нагласи дека најважната уставна одредба е дека во етички, морални и национални прашања, националното право има предност пред меѓународното право.
Двајцата лидери остро го критикуваа планот на ЕУ за постепено укинување на рускиот гас и нафта.
-Никој не треба да ни кажува од каде да купуваме нафта и гас, рече Фицо. – Според меѓународното право, суверена земја е таа што одлучува за својот енергетски микс. Јас го споделувам ставот на премиерот на Унгарија дека политичката идеолошка одлука за целосно исклучување на Европа од руската нафта и гас не само што најмногу ќе ги повреди Унгарија и Словачка, туку значително ќе наштети на целата Европска Унија, оцени словачкиот премиер.
Фицо го пофали Орбан за справувањето со илегалната миграција, истакнувајќи дека Брисел го напаѓа и понижува наместо да ги цени неговите напори. Тој рече дека борбата против илегалната миграција и отфрлањето на мигрантските квоти се важни. За војната во Украина, тој изјави: „Има само двајца премиери во Европската Унија кои зборуваат за мир, а еден од нив дефинитивно е Виктор Орбан“.
Премиерот на Унгарија, Виктор Орбан, го пофали Фицо како „непопустлив и несоборлив“ лидер со единствена способност да воспостави ред во словачката политика. Орбан, исто така, нагласи дека историјата на мостот, кој бил уништен во двете светски војни, учи дека „не сакаме да ги повторуваме грешките од минатото“ и ја потврди посветеноста на Унгарија на мирот.
Орбан упати остра критика кон актуелната европска политика. – Исто како што старите империи кои владееја со нас, сега Европската Унија стана воен проект, рече унгарскиот премиер. – Сега, кога Брисел зборува за мир во Европа, тој всушност мисли на војна, додаде тој, предупредувајќи дека пристапот на ЕУ, особено нејзината визија за пораз на Русија на источниот фронт, ризикува да ги повтори катастрофалните грешки од минатото.
Тој ја истакна солидарноста и соработката, најавувајќи дека Унгарија сака заеднички да работи со Словачка за да спречи идно уништување и предложи изградба на втор, товарен мост меѓу Естергом и Штурово. – Сакаме да осигуриме дека никогаш повеќе нема да мора да го обновуваме овој мост“ заклучи Орбан. – Да градиме заедно. И да се сретнеме повторно на инаугурацијата на следниот, посака премиерот на Унгарија.
Претходно, на настанот се обрати и Адам Хернади, градоначалникот на Естергом. – Овој мост е наше заедничко минато“, рече тој,. додека Еуген Сабо, градоначалникот на Штурово, истакна дека од утре (денеска), отворените периоди на мостот ќе бидат подолги и ќе продолжат да се зголемуваат, почесто поврзувајќи ги двата града.
Мостот „Марија Валерија“ бил инаугуриран на 28 септември 1895 година. Бил разнесен двапати – во 1919 и 1944 година – и останал нерепариран со децении, а повторно е изграден и отворен во 2001 година.
