Авион на „Аустријан ерлајнс“ денеска слета со 154 патници на охридскиот аеродром „Свети апостол Павле“, со што беше означен почетокот на новата воздушна врска меѓу Виена и Охрид. Летовите ќе се реализираат двапати неделно, секои четврток и недела, во периодот до 18 октомври, овозможувајќи директна поврзаност на Охрид со еден од најважните европски воздухопловни центри.
Министерот за транспорт, Александар Николоски, истакна дека отворањето на линијата има стратешко значење за државата и за развојот на воздушниот сообраќај.
– Ова е значаен ден за охридскиот аеродром и за целиот регион. Преку аеродромот во Виена, патниците од Охрид ќе имаат пристап до повеќе од 200 конектинг-лета кон 66 држави во Европа, Северна Америка, Азија и во Африка. Тоа значи нови можности за туризам, бизнис и за економски развој – изјави Николоски.
Тој посочи дека особено е важно што линијата ја оперира токму „Аустријан ерлајнс“, една од најреномираните европски авиокомпании, што претставува дополнителна потврда за атрактивноста на македонскиот пазар.
Генералниот директор на „ТАВ Македонија“, Неџат Курт, оцени дека новата авиолинија ќе придонесе за зголемување на бројот на туристи и за подобрување на меѓународната поврзаност на земјава.
– Оваа авиолинија ќе донесе бројни придобивки – од раст на туристичкиот промет до подобра економска поврзаност на земјава. Нашите очекувања се дека ќе донесе околу 5.000 дојдовни патници, што ќе има позитивен ефект врз локалната економија и врз туристичкиот сектор – нагласи Курт.
Според него, отворањето на новата линија доаѓа во период кога македонските аеродроми бележат значителен раст на патничкиот сообраќај и се меѓу најбрзорастечките аеродроми во Европа.
Од „Аустријан ерлајнс“ истакнаа дека со воведувањето на летовите кон Охрид, дополнително го зајакнуваат своето присуство во Северна Македонија.
– Горди сме што ја отвораме втората дестинација во Македонија. Охрид станува сè попривлечен за патниците од целиот свет и веруваме дека оваа линија ќе придонесе за уште поголема туристичка и деловна размена меѓу двете земји – изјави Штефан Линхарт, виш директор за продажба за Централна и Источна Европа, Израел и Турција во групацијата „Луфтханза“.
Поддршка за новата авиолинија изрази и заменик-шефот на мисијата на австриската амбасада во Македонија, Матијас Хуменбергер.
– Оваа директна врска претставува важен чекор во зајакнувањето на односите меѓу Австрија и Македонија. Покрај подобрената поврзаност, линијата ќе придонесе и за развој на туризмот, деловната соработка и на културната размена меѓу двете земји – рече Хуменбергер.
Новата линија Виена – Охрид е втора новоотворена авиолинија од охридскиот аеродром во текот на овој месец. Во меѓувреме беа воспоставени и летови кон Вроцлав и Катовице во Полска, како и сезонските линии на „Ер Србија“ од Белград и „Туркиш ерлајнс“ од Истанбул.
Со новата авиолинија, од охридскиот аеродром во моментов се реализираат вкупно 17 дестинации преку осум авиокомпании, од кои 14 се редовни и сезонски линии, а три се чартер-летови.
Од Владата очекуваат дека новите воздушни врски ќе придонесат за поголем прилив на странски туристи, нови инвестиции и за забрзан економски развој на Охрид и поширокиот регион, додека паралелно продолжува реконструкцијата на аеродромската инфраструктура со цел натамошно зголемување на капацитетите и на бројот на патници.
