Индустриското производство во Македонија во мај 2026 година е намалено за два проценти во споредба со истиот месец минатата година, додека во периодот јануари – мај е забележан пад од 0,3 проценти во однос на истиот период лани, покажуваат најновите податоци на Државниот завод за статистика.
Според статистиката, единствен раст на годишно ниво е регистриран во секторот снабдување со електрична енергија, гас, пареа и климатизација, каде производството е зголемено за 6,1 процент. Истовремено, рударството и вадењето камен бележат пад од 3,6 проценти, а преработувачката индустрија е намалена за 2,6 проценти.
Најголем придонес кон мајскиот пад имаат намаленото производство на електрична опрема (7,8 проценти), машини и уреди (12,9 проценти), како и производството на моторни возила, приколки и полуприколки (2,3 проценти).
Негативните резултати во преработувачката индустрија се должат и на намаленото производство во повеќе гранки, меѓу кои се прехранбената индустрија и индустријата за пијалаци, производството на тутунски производи, текстил и облека, хемиската и фармацевтската индустрија, металопреработката, како и производството на електрична опрема, машини и моторни возила.
Според главните индустриски групи, раст во мај е забележан кај енергијата (6,5 проценти) и интермедијарните производи, освен енергија (3,4 проценти). Од друга страна, капиталните производи се намалени за 3,3 проценти, трајните производи за широка потрошувачка за 1,1 процент, а најголем пад е регистриран кај нетрајните производи за широка потрошувачка – 8,4 проценти.
