Како што пристигнуваат анкетите во штабот на ДУИ во Чаир, во кои апсолутната предност е во полза на Изет Меџити, кандидатот на Вреди (Влен) почнува да се разработува и план за оспорување на изборните резултати, дознава Плусинфо од свои партиски извори.
Наводно, Бујар Османи сметал дека треба да се инвестира во градење лажна перцепција во јавноста дека ДУИ води пред Вреди со разлика 3:1, за да се претстави како извесен победник. Иако повеќето релевантни истражувања упатуваат дека рејтинзите на коалицијата на ДУИ и на коалицијата Вреди се речиси изедначени, Османи сметал дека вечерта на 19 октомври треба да ги обвини ВМРО-ДПМНЕ и Изет Меџити дека му ја украле победата и затоа да не го признава поразот.
Како што пишува Плусинфо претходно, се ковал план, во текот на кампањата, да почнат серија обвинувања на адреса на Вреди, дека наводно ја злоупотребуваат власта за купување и за присилба на гласачите во Чаир, Сарај, Студеничани, Арачиново, Тетово, Струга, Дебар и во Кичево.
Доколку успее да ги убеди членството и симпатизерите дека со предизборен инженеринг се суспендира волјата на мнозинството Албанци, ДУИ планира тоа да го искористи како иницијална каписла за постизборни протести, кои треба да предизвикаат политичка криза.
Ова не е прв пат да се говори за вакви деструктивни сценарија. Во март оваа година, Вреди ја обвини ДУИ дека подготвува бојкот и провокации на денот на локалните избори. Тогаш ДУИ излезе со став дека ако Уставниот суд го чепне Законот за употреба на јазиците, ќе ги бојкотираат локалните избори.
Затоа, од оваа перспектива, воопшто не е за чудење тоа што Бујар Османи упорно се обидува да наметне теми за наводно оспорување на легитимитетот на Албанците и инсистира на дуел со ВМРО-ДПМНЕ, обвинувајќи ги дека ја игнорираат волјата на Албанците и порачувајќи им дека поради тоа се создавал „сенароден“ албански отпор против власта.
Дали на 19 октомври ќе надвладаат заговорниците на ова сценарио за оспорување на изборниот резултат, или некој од ДУИ јавно ќе го повика Бујар Османи да не се обидува да се претставува како лажна жртва за да си ја спасува политичката кариера, останува да видиме.
Она што поважно е што владините партнери ВМРО-ДПМНЕ, Вреди и ЗНАМ уверуваат дека се запознаени со потенцијалот на ДУИ за оспорување на изборниот резултат и се подготвени да го пресретнат овој јалов обид за деструктивни дејствија, пишува Плусинфо.мк.
