Поништен е тендерот за нови униформи за полицијата, објави „360 степени“. Причината според медиумот е тоа што компанијата чија понуда била избрана за „јакна“ и за „теренска униформа“ за редовната полиција, самата по себе немала доволен број вработени и затоа приложила техничка поддршка од фирма од Србија.
Причината за поништувањето е тоа што во тендерската документација, меѓу другите критериуми, МВР барало понудувачите да имаат сопствен технички капацитет и минимум број на вработени 50 лица за производство на јакни, но и 100 лица за теренската униформа. „Мега Спорт“ во својата понуда навеле дека го исполнуваат овој услов, но не самостојно, туку преку т.н. техничка поддршка од српската компанија „Лус Текстил“.
Но, според Комисијата за жалби по јавни набавки, во таков случај српската фирма требало да биде пријавена како подизведувач, што не било сторено.
Најдобрата понуда за јакна и за теренска униформа која е поништена е во вредност од 6.1 милиони евра.
Огласот за јавна набавка кој го објави МВР имаше четири дела – јакна, теренска униформа, чизми и чевли.
Државната комисија за жалби по јавни набавки донесе решение со кое ја усвои жалбата на „Микеи интернационал“ и го поништи изборот на МВР во деловите – теренска униформа и виндјакна.
