Ролан Гарос ќе му оддаде почит на Рафаел Надал на првиот ден од годинешното издание на грен слем турнирот што ќе почне идниот месец, една година откако легендарниот шпански тенисер и освојувач на рекордни 14 титули во Париз го одигра својот последен дуел во француската престолнина, објавија денеска организаторите.
Надал првпат испадна од Ролан Гарос во првото коло по поразот од Александар Зверев минатата година, но тогаш не кажа дали тоа е последен пат навивачите да го видат во Париз.
Надал, освојувач на 22 грен слем титули, стави крај на својата блескава кариера претставувајќи ја Шпанија во Дејвис купот во ноември и сега ќе се врати на арената на која испиша историја.
„Рафа испиша историја на Ролан Гарос и неговите 14 титули може да останат ненадминати“, изјави директорката на турнирот и двократна победничка на Ролан Гарос, Амели Морезмо.
„Церемонијата во чест на Рафа ќе се одржи на крајот од дневната сесија на 25-ти мај. Идејата е да имаме визија за иднината, а притоа да ги славиме оние кои не воодушевуваа во минатото“, рече Морезмо.
Вкупниот награден фонд за турнирот, кој ќе трае од 25 мај до 8 јуни, изнесува 56,352 милиони евра, што е за 5,21 отсто повеќе од 2024 година.
