Зајакнување на билатералната соработка и разгледување на можностите за инвестиции во инфраструктурата – ова е во фокус на состанокот меѓу претседателот на Владата, Христијан Мицкоски и претседателот на Обединетите арапски емирати, шеикот Мухамед Бин Зајден Ал-Нахјан – на чија покана владина делегација на чело со премиерот отпатува во Емиратите.
„Во рамки на официјалната посета на Обединетите Арапски Емирати, остварив средба со Претседателот на ОАЕ и владетел на Абу Даби, Н. В. Шеикот Мухамед Бин Зајед Ал-Нахјан, на чија покана се реализира оваа посета. Целта е зајакнување на билатералната соработка и разгледување на можности за инвестиции во инфраструктура, агро-бизнис, обновливи извори на енергија, туризам, иновации и нови технологии“, изјави Христијан Мицкоски, премиерот на Македонија.
Премиерот во Обединетите Арапски Емирати е заедно со министрите за транспорт Николоски и надворешни работи и надворешна трговија Муцунски, а планирани се и средби со голем број потенцијални инвеститори, бизнисмени и сопственици од агро-бизнисот, компании кои работат на обновливи извори на енергија и иновации од современата технологија.
Министерот за транспорт објави дека планирани се и повеќе средби со бизнисмени и членови на тамошната бизнис комора и дека македонската влада активно продолжува да работи на воспоставување партнерства и можни инвестиции кои ќе овозможат иновативни проекти во земјава.
„Деновиве сум дел од високата делегација предводена од Претседателот на Владата, Христијан Мицкоски во Обединетите Арапски Емирати каде што се предвидени бројни средби и тематски состаноци. Во рамки на посетата ќе оствариме средба со претседателот на ОАЕ воедно и владетел на Емиратот Абу Даби, Н.В. Шеикот Мухамед Бин Зајед Ал-Нахјан и со Н.В. Шеикот Мохамед бин Рашид Ал Мактум, потпретседател и премиер на ОАЕ, и владетел на Емиратот Дубаи, како и повеќе државни инвестициони фондови на Емиратот Абу Даби и стопански комори“, изјави министерот за транспорт и врски Александар Николовски.
Владата ги проширува активностите во насока на економско поврзување на државата со новите пазари од Блискиот исток. Планирани се повеќе средби на највисоко ниво и со развојниот холдинг на Абу Даби, со државната инвестициска компанија „Мубала“, како и државната енергетска компанија „Масдар“.
Планирани се и средби со неколку стопански комори со цел разгледување на можностите за соработка во инфраструктурни проекти. Покрај премиерот и министрите, како дел од владината делегација се и генералниот секретар на Владата Игор Јанушев и директорот на дирекцијата за технолошко индустриско развојни зони Гоце Димовски, како и националниот координатор за туризам Акан Махмут и претставници на уште неколку државни институции.
