Судот на Обединетите нации за воени злосторства го одби барањето за предвремено ослободување на Ратко Младиќ, поранешниот командант на босанските Срби, кој издржува доживотна казна затвор за геноцид, злосторства против човештвото и воени злосторства во Босна и Херцеговина.
Младиќ, кој има 84 години, побарал ослободување од хуманитарни причини поради сериозно влошена здравствена состојба. Судот призна дека тој се наоѓа во „последната фаза од животот“ и дека неговата состојба е тешка, но оцени дека тоа не е доволна основа за ослободување.
Во одлуката се наведува дека условите во затворската единица на ОН во Хаг му обезбедуваат соодветна медицинска грижа и максимална удобност. Судот заклучи дека нема дополнителен третман што би му бил достапен на друго место, а не е достапен во Холандија.
Според претходните судски документи, Младиќ има когнитивни оштетувања и во последните години повеќепати бил хоспитализиран. Неговата одбрана бараше итно привремено или условно ослободување, наведувајќи дека ризикот од непосредна смрт е висок и дека треба да биде сместен во болница или хоспис каде што се зборува српски јазик.
Младиќ беше осуден на доживотен затвор во 2017 година, а пресудата беше потврдена по жалба во 2021 година. Тој беше прогласен за виновен за геноцидот во Сребреница, каде во 1995 година беа убиени повеќе од 8.000 бошњачки мажи и момчиња, како и за тероризирање на цивилното население за време на опсадата на Сараево.
За време на војната во Босна и Херцеговина од 1992 до 1995 година беа убиени повеќе од 100.000 луѓе, а околу два милиони беа раселени. Младиќ беше во бегство 16 години, сè до неговото апсење во Србија во 2011 година, по што му се судеше во Хаг.
