Британскиот орган за контрола на конкуренцијата започна истрага против „Рајанер“ поради неговата практика на наплата на дополнителни такси од родителите кои сакаат да седат со своите деца на летовите. Управата за конкуренција и пазари (УКП) ќе испита дали политиката на „Рајанер“, според која родителите мора да платат за да резервираат седиште со деца, е во согласност со законот за заштита на потрошувачите, објавува „Мирор“.
Истрага за задолжителна такса
Ирската нискобуџетна компанија бара барем еден родител да седи со деца на возраст меѓу две и 11 години, но ова е условено од плаќање на таканареченото задолжително семејно седиште, кое чини околу 8 фунти (околу 9,30 евра) по насока. Резервацијата на седиште е опционална за другите патници.
УКП истражува дали „Рајанер“ всушност им наплаќа на родителите за да ги исполнат сопствените безбедносни обврски кон децата и лицата со попреченост, како што е пропишано со прописите за воздухопловство. Регулаторното тело истакнува дека „Рајанер“ е „единствената голема авиокомпанија што лета од Обединетото Кралство што наметнува оваа такса“.
Другите превозници, според УКП, сместуваат деца со нивните родители без дополнителна такса или автоматски им доделуваат седишта едно до друго при резервација.
„Многу семејства штедат за да си дозволат одмор и знаеме дека дополнителните трошоци можат брзо да ја зголемат цената. Нашата истрага ќе го разгледа пристапот на „Рајанер“ кон резервациите на семејни седишта и како трошоците им се презентираат на потрошувачите, за да се утврди дали тие се придржуваат кон законот за заштита на потрошувачите“, изјави Хејли Флечер, виш директор за заштита на потрошувачите во CMA
Рајанер: Истрагата е лажна и неуспешна
Во соопштението, Рајанер ја нарече истрагата „лажна“ и „неуспешен обид на владата на Стармер да се преправа дека се грижи за потрошувачите“.
„Политиката на Рајанер за семејни седишта целосно е во согласност со сите релевантни закони и прописи и им заштедува пари на семејствата кога патуваат со најевтината авиокомпанија во Велика Британија“, се вели во одговорот. Компанијата тврди дека „тие не наплаќаат никаква такса за децата да седат до своите родители“, туку дека „родителите што патуваат со деца плаќаат само за едно резервирано седиште (за возрасни).“
„Оваа лажна истрага од страна на CMA е неуспешен обид на Владата на Стармер да се преправа дека се грижи за потрошувачите, а истовремено да не успее да го укине Данокот за авиокомпании (APD), што веднаш би ги намалило цените за сите потрошувачи и би го поттикнало растот на авијацијата во Велика Британија, туризмот и пошироката економија. Рајанер со нетрпение очекува да ги побие овие лажни тврдења од страна на CMA“, заклучија тие.
