Во Рио де Жанеиро започнува дводневниот самит на БРИКС, а министрите за финансии на земјите-членки на организацијата веќе повикаа на реформа на Меѓународниот монетарен фонд (ММФ), вклучително и нова распределба на правото на глас и укинување на традицијата на европско лидерство на организацијата.
Функционерите на земјите од БРИКС се согласија да издадат заедничка декларација на крајот од самитот во Рио де Жанеиро, потврдија за „Ројтерс“ неименувани добро информирани извори.
Преговарачите, кои се подготвуваа за самит на лидерите во текот на изминатата недела, се мачеа да се договорат за војната во Појасот Газа, а немаше договор за конфликтот Иран-Израел и застапеноста на Африка во предложената реформа на Советот за безбедност на Обединетите нации, велат изворите.
Еден извор рече дека групата се согласила за силна изјава за конфликтот на Блискиот Исток.
За време на главната пленарна сесија во Рио де Жанеиро, посветена на мирот, безбедноста и реформите на глобалното управување, лидерите ќе разговараат за перспективите за понатамошна соработка во рамките на БРИКС во политичката, трговската, економската и културно-хуманитарната сфера и ќе разменат мислења за најитните прашања на меѓународната агенда.
Рускиот претседател Владимир Путин ќе учествува на главната пленарна сесија на 17-тиот самит на БРИКС преку видео врска, соопшти Кремљ.
За прв пат по повеќе од една деценија на власт, кинескиот претседател Си Џинпинг – кој го направи БРИКС централен во својата визија за редефинирање на глобалната рамнотежа на моќ – нема да присуствува на годишниот собир на лидери, објави „Си-Ен-Ен“. Сепак, набљудувачите велат дека отсуството на кинескиот претседател од Бразил не значи дека Кина ја потценува важноста на БРИКС или нејзината стратегија за градење сојузи што можат да го намалат влијанието на Западот.
