Само околу два месеци во годината жителите на Македонија дишат чист воздух во градските населби. Чист воздух се дише само во Кочани, Миладиновци, Охрид и периферијата на Битола, кажаа дел од еко-активистите на денешната надзорната расправа на собраниската Комисија за здравство.
Освен што загадувањето зема човечки животи, познавачите велат дека трпиме и сериозни финансиски загуби поради неквалитетниот воздух.
Според нив, искуствата од други држави покажале дека со соодветна политика може да бидат постигнати резултати во период од три до пет години, а проблемот може да биде комплетно решен за седум години.
Во однос на најголемите трујачи, анализите на еко-активистите покажале дека согорувањето на нафта и мазут, огревното дрво и сообраќајот се трите најголеми предизвикувачи на аерозагадувањето во Македонија.
Инаку, според Европската агенција за животна средина во 2022 година поради хронична изложеност на аерозагадување прерано починале 3 600 македонски граѓани.
Во Скопје пак според проценките на активистите, 1 200 луѓе годишно умираат како резултат на загаден воздух, а УНИЦЕФ проценува дека 11,6 проценти од смртните случаи кај новороденчиња под една година се од аерозагадувањето.
