Потресно сведочење денеска во судницата за пожарот во дискотеката „Пулс“. Дејан Манасиев, кој со години работел како шанкер во објектот, ги опиша моментите на ужасот, но и голготата што ја поминува десет месеци по трагедијата. Иако нема да бара затвор за обвинетите, тој најави оштетно побарување поради уништеното здравје.
„Огнот се прошири екстремно брзо. Внатре имаше околу 500 луѓе, а простор за реакција речиси и да немаше“, изјави Манасиев. Тој откри дека дури и по лекувањето во Штип, Скопје и Грац, неговата состојба е критична, а нивото на кислород во крвта (сатурацијата) му паднало на загрижувачки 65 проценти.
Шокантен е и податокот дека Манасиев работел во дискотеката уште од 2012 година, но без никаков договор за работа и без основна обука за заштита. Тој со солзи во очите потсети дека негови колеги не успеале да излезат живи од огнената стихија, оставајќи трајни лузни кај сите преживеани.
