Судијката Даниела Димовска е избрана за вршител на должноста претседател на Основниот кривичен суд Скопје, откако претходниот претседател Иван Џолев беше избран за судија во Апелациониот суд. Одлуката е донесена на денешната седница на Судскиот совет.
Кандидатурата на Димовска ја предложи координаторката Данка Ристова, која во образложението посочи дека процедурата за избор е правно спорна поради начинот на оценување и недоволна усогласеност на прописите за назначување на в.д. претседатели. Сепак, Ристова истакна дека нејзиниот предлог е во согласност со постојната пракса, по што Димовска беше избрана со мнозинство гласови.
На истата седница, Судскиот совет донесе одлуки и за други вршители на должноста претседатели:
Елјеса Алији за Основен суд Гостивар
Мерсим Марку за Основен суд Дебар
Валентина Буревска за Основен суд Свети Николе
Нивните мандати започнуваат на 6 јули 2025 година.
Судскиот совет денеска разреши и дел од судиите поротници во судовите во Свети Николе, Основниот кривичен суд Скопје и Основниот граѓански суд Скопје, поради истек на мандатот.
Дополнително, беше изгласана одлука за формирање комисии за увид и оценка на пријавите по огласот за избор на редовни претседатели во судовите во Дебар, Гостивар и Свети Николе.
По предлог на членот на Советот, Селим Адеми, Советот донесе одлука за едногодишно делегирање на судијата Драган Јаковлески од Основен суд Битола во Основен суд Прилеп, со цел подобрување на функционирањето на судот.
