Шефот на Одделот на ФИФА за глобален развој на фудбалот Арсен Венгер ги отфрли критиките дека Светското клупско првенство е „најлошата идеја имплементирана во фудбалот“ и најави дека турнирот во иднина ќе се одржува на секои четири години.
Венгер оцени дека Светското клупско првенство, кое во нов формат со учество на 32 клубови се одржува во ова лето во САД за прв пат во историјата, е успешно, со висококвалитетни натпревари и поголема посетеност од очекуваната.
Поранешниот тренер на Арсенал изјави дека 32 тимови уживале во искуството и оти „100 проценти сакаат повторно да играат“.
Минатата сезона, бројни фудбалери, клубови, медиуми и навивачи, вклучувајќи го и поранешниот тренер на Ливерпул, Јирген Клоп, го критикуваа новиот формат на Светското клупско првенство поради големиот број натпревари, скратениот одмор за играчите и можни повреди поради згуснатиот календар.
„Секој има право на мислење, а јас воопшто не го делам ставот на Јирген Клоп. Мислам дека Светското клупско првенство е неопходно. Ако ги прашате сите клубови што биле тука, 100 проценти би одговориле дека сакаат повторно да го сторат тоа. Тоа е најдобриот одговор на прашањето што мислат клубовите за Светското клупско првенство“, рече Венгер.
Венгер потврди дека турнирот ќе се одржува на секои четири години.
„Следниот ќе биде во 2029 година. Тоа отсекогаш било случај“, рече тој.
ФИФА соопшти дека околу 2,5 милиони навивачи присуствувале на натпреварите во САД, од кои 148.098 ги гледале двата полуфинални натпревари претходно оваа недела во Њу Џерси.
