По повод одбележувањето 120 години од погибелта на македонскиот војвода Александар Турунџев, вчеравечер со свечена церемонија беше откриен споменик на овој национален херој и симбол на борбата за слобода на македонскиот народовој, на Ат – Пазар, во Битола.
Градоначалникот на Општина Битола, Тони Коњановски заедно со потомци од семејството Турунџиеви, пред бројните битолчани, гости го открија споменикот на војводата на што претходеше своевидна претстава поткрепена со исторска симболика.
-Токму на денот на погибието пред 120 години, на овој 30 август, Битола ја исправи својата вечна должност и му подари споменик на Александар Турунџев“, порача градоначалникот Коњановски, стои во објавата на фејсбук профилот на Општина Битола.
На свечениот чин му претходеше поворка низ битолските улици, испреплетена со историски факти. На почеток, се посочува, граѓаните се собраа пред ОУ „Ѓорги Сугарев“, местото каде Турунџев бил затворен, каде беше развиорено македонското знаме од млади момчиња облечени во комитска носија, членови на КУД „Илинден“ Битола. Поворката беше придружувана со блех музика и групата Љубојна како и младите зурлаџии и тапанџии од АФ „Гоце Делчев“ Битола, а предводник на поворката беше коњаницата „Костурска чета“.
Бројни граѓани се приклучуваа на поворката која се движеше низ Плоштадот „Магнолија“, покрај реката Драгор до Ат Пазар каде и беше погубен војводата, па се новиот кружен тек каде е поставен споменикот на Турунџев.
На сцената македонската државна химна ја отпеа правнуката на Турунџев, певицата Сузана Турунџиева, а оперскиот пејач Игор Дурловски во аранжман на Николче Мицевски ја изведе песната посветена на војводата Турунџев – „Црно му било пишано“.
Претходно на неговиот гроб кој се наоѓа во црквата „Св. Недела“ во Битола, се одржа панихида на која присуствуваа градоначалникот на Општина Битола Тони Коњановски, претставници на локалната власт, на повеќе институции, како и граѓани кои се поклонија пред споменот на Турунџев.
Македонскиот револуционер, ајдутин, четник и војвода Александар Турунџев, бил предаден на турските власти за 150 златници од свој сонародник, по што бил обесен на Ат-Пазар во Битола на 30 август 1905 година. Турунџев покрај тоа што се смета за симбол на она што многу често провејува низ македонската историја – предавството, многу повеќе е национален херој и симбол на борбата за слобода на македонскиот народ.
