За најавата на Мицкоски за отворање рудник со антимон во кривопаланечко Луке мора да има поширока јавна дебата и секако да се прашаат граѓаните, тие да одлучат, посочува СДСМ во соопштение.
„Ова е сериозно прашање, станува збор за тоа оваа држава како одлучува за своите ресурси, за здравјето на граѓаните и за иднината на локалните заедници“, велат од СДСМ, потсетувајќи на старото еколошко жариште Лојане кое со децении стои нерешено, а во исто време се најавува нов рудник за антимон.
„Не сме против инвестиции. Но, не може моделите да бидат фокусирани на профитот и бизнисот, со висок ризик по здравјето на граѓаните. Не може да се зборува само за економска корист која не е сигуна. А при тоа никој да не зборува за загадувањето и опасноста по луѓето, за цената на загадена вода, за цената на заболени луѓе и за цената на уништено земјоделие. Тоа не се бројки во извештаи, тоа се последици кои траат со генерации“, велат од СДСМ.
Од опозициската партија сметаат дека ако државата не може да го реши Лојане, тогаш нема кредибилитет да отвора нови рудници, како и дека за вакви проекти граѓаните мора да бидат прашани и да учествуваат во процесот на донесување одлуки.
Бараме јавни расправи со реално влијание, локален референдум и вклучување на стручната и локалната јавност. Затоа што ова не е техничко прашање туку прашање за здравје и за иднина“, се нагласува во соопштението.
Од СДСМ сметаат дека мора да бидат исполнети неколку клучни услови: Владата итно да ги реши постојните еколошки жаришта, без што не може да инсистира на отворање нови рудници, како и целосна транспарентност пред граѓаните, односно сите договори, економски параметри, студии за влијание мора да бидат јавно објавени, исто како и детални информации за фирмите кои стојат зад ова.
Понатаму, од СДСМ посочуваат дека системот мора да биде затворен еколошки систем без испуштање во почва, вода или воздух, да се побара однапред финансиска гаранција од инвеститорот за санација на евентуални штети, да се обезбеди независен мониторинг со јавни податоци достапни во реално време, да има директен локален бенефит за општината и за граѓаните, како и да се обезбеди континуирана здравствена заштита и следење на населението финансирани од инвеститорот.
„Доколку овие услови не се исполнат, тогаш подобро е да нема рудник“, велат од СДСМ.
