Опозицискиот Социјалдемократски сојуз на Македонија (СДСМ) реагира на изјавата на премиерот Христијан Мицкоски дадена во телевизиско гостување синоќа, а во која рече дека целта на воведувањето електронско гласање на дијаспората е да се овозможи македонските граѓани во странство полесно да го остваруваат своето гласачко право и оти не разбира зошто СДСМ и Левица се против тоа.
Според социјалдемократите од Бихаќска, станува збор за уште една лага на премиерот бидејќи, како што велат, дијаспората и сега гласа согласно постојниот модел, а измените на кои инсистира ВМРО-ДПМНЕ се предвидува да почнат да се применуваат од претседателските избори во 2029 година, па понатаму.
Главната цел на Мицкоски и ВМРО-ДПМНЕ, велат од СДСМ, е да истурка Изборен законик што ќе овозможи изборен грабеж преку злоупотреба на 200 000 гласа.
„Откако насилно ја укина техничката влада и проба шверцерски да протне Изборен законик за нов изборен грабеж со злоупотреба на 200 000 гласа, сега вели целта му била гласањето на дијаспората и дека СДСМ не сака да дозволи да гласаат сограѓаните од дијаспора. Ова е чиста лага. Прво затоа што дијаспората гласа и сега, со постојниот модел, второ затоа што измените што ги предлага се за 2029 година“,се вели во соопштението од Социјалдемократскиот сојуз.
Оттаму додаваат дека причината поради која премиерот и партијата со која раководи настојуваат да ја протнат оваа измена на Изборниот законик што води кон изборен грабеж е бидејќи ВМРО-ДПМНЕ ја губи поддршката од граѓаните и сака изгубените гласови во Македонија да ги надомести преку злоупотреба со електронско гласање од надвор.
„А сите знаеме како ВМРО ги крадеше изборите. Додека секој граѓанин кој гласа во татковината минува низ строга процедура, проверка, личен документ, потпис во избирачкиот список, идентификација со отпечаток од прст, Мицкоски сака да нема никакви правила и да нема никаква контрола за гласањето на дијаспората. Уште една лага на Мицкоски е разобличена“,наведуваат од опозициската партија.
Премиерот Христијан Мицкоски во синоќешното гостување во централниот „Дневник“ на телевизија Сител ги отфрли тврдењата на опозицијата дека со воведувањето на можноста за електронско гласање на дијаспората на избори ќе ја отвори вратата за изборни манипулации. Тој ги повика опозициските СДСМ и Левица, кои се противат на ова решение, да седнат на разговори со владејачкото мнозинство и да се најде модалитет како македонските државјани што живеат во странство наједноставно да го остварат своето гласачко право. Гласањето, како што рече, може да биде електронски или преку писма.
Инаку, во соопштението СДСМ го оценува како уште една лага тврдењето на премиерот Мицкоски дека на минатонеделната собраниска седница, на чиј дневен ред беа пратенички прашања, не му се заканувал на лидерот на опозициската партија Венко Филипче.
„Мицкоски вели дека не се заканувал. Повторно лаже, граѓаните слушнаа како од говорница на македонското Собрание се закани со затвор и политички прогон за сите политички неистомисленици. Вели не навредувал а постојано ги навредува граѓаните како ‘талог на општеството’, ‘глодачи’ ‘медиокритети’, ‘мекотели’… Мицкоски постојано лаже. Пред неколку дена рече заминува од политиката и се враќа на Факултет, вчера вели не кажав кога“,велат од Социјалдемократскиот сојуз.
Премиерот во гостувањето на телевизија Сител изјави дека не упатил закани кон лидерот на СДСМ, Венко Филипче, на седницата за пратенички прашања минатата недела, туку само го пренел тоа што е глас на народот и што стигнува до него.
Инаку, на седницата за пратенички прашања на 25 јуни, Филипче упати серија критики до премиерот и Владата, обвинувајќи за лошата економска состојба во државата, стагнацијата во евроинтеграции, заминувањето на младите и за партиски тендери, на што Мицкоски одговори: „Кога луѓето ќе ве видат зад решетки, тогаш ќе бидат среќни бидејќи правдата дошла“.
Од СДСМ велат дека премиерот со синоќешните изјави повторно лаже, исто како што лажел за Преспанскиот договор, враќањето на името, преговарачката рамка, дека е загрозен македонскиот идентитет и дека Македонија е трета економија во Европа.
„Народот знае, кој лаже тој и краде. Фронтот за вистина и правда ќе ја врати власта во рацете на граѓаните а потоа сите ќе одговараат пред независното судство и пред законот“,порачуваат од СДСМ на крајот од соопштението.
