Зградата на Владата утре напладне ќе биде блокирана од синдикалците како знак на протест против неисполнувањето на барањето за зголемување на минималната плата на 600 евра и за сите други плати за 100 евра. Од ССМ велат дека револтот расте, откако пратениците го игнорирале нивното барање за намалување на платите за 80% на функционерите, со цел да се намали базата за пресметка на просечната и минималната плата.
„Сметаме дека по утрешната блокада, сопствениците и работодавачите ќе покажат разбирање, бидејќи видоа дека, покрај сите закани и притисоци, не се предаваме и нема да се откажеме додека не се зголемат минималните плати и другите плати. Ќе се видиме утре во 11:00 пред Владата!“, изјави Трендафилов.
Претседателот на ССМ, Слободан Трендафилов, истакна дека следниот чекор ќе биде генерален штрајк во јавниот и приватниот сектор.
Генералниот штрајк ќе се одржи на целата територија на државата, а сите вработени во приватниот сектор ќе бидат повикани да не одат на работа и да се приклучат на протестот што ќе се организира како дел од штрајкот. Оваа одлука ќе се донесе по утрешниот протест и по одлуките на седницата на Владата.
„Колку повеќе работниците ќе се поддржуваат меѓусебно, толку повеќе ќе добијат, бидејќи се гледа дека ако работниците не се поддржуваат, претставниците на Владата и работодавачите, не само сегашните, туку и претходните, не го сфаќаат дека вработените заслужуваат плата. Пораката што работниците ја испраќаат преку стравот и неизлегувањето на улица е дека се задоволни со платите и се плашат, слушајќи повеќе политика отколку да се борат за зголемување на платите.“, вели Трендафилов.
На последниот дијалог во Социо-економскиот совет, Владата и работодавачите го образложија непокачувањето на платите со продуктивноста на работното место. ССМ објави податоци од Меѓународната организација на трудот според кои работниците во Македонија произведуваат повеќе од двојно економска вредност од сумата што ја примаат.
