Гувернерот на Народната банка, д-р Трајко Славески, во рамките на Годишните средби на Меѓународниот монетарен фонд (ММФ) и Светската банка, што се одржуваат во Вашингтон, оствари низа билатерални средби со високи претставници на ММФ. На средбите присуствуваше и министерската за финансии Гордана Димитриеска-Кочоска, соопштија од Народната банка.
Гувернерот Славески се сретнал со заменик-директорот на ММФ, Бо Ли, директорот на Европскиот оддел во ММФ, Алфред Камер, извршниот директор Јерун Клик, заменик-директорите Марникс ван Рај и Владислав Рашкован и шефот на Мисијата на ММФ за нашата земја, Ник Гигинеишвили.
На средбите, високите претставници на ММФ искажале задоволство од приклучувањето и извршувањето на првите трансакции во СЕПА, како и од потпишувањето на Писмото на намери со Банката на Италија за развивање клон на ТИПС на ЕЦБ за земјите од Западен Балкан за натамошна модернизација и за овозможување инстант плаќања во домашните, во меѓусебните прекугранични финансиски активности и во финансиските активности со другите земји во СЕПА.
На средбите се разговарало за најновите макроекономски случувања во земјава, како и за очекувањата за идните движења. Гувернерот Славески истакна дека Народната банка е цврсто посветена на одржувањето на ценовната стабилност, за што се осврна на мерките преземени од страна на централната банка за остварувањето на оваа цел. Исто така, гувернерот ги образложи новите макропрудентни мерки донесени од Народната банка насочени кон понатамошно одржување на финансиската стабилност.
Претставниците на ММФ посочиле дека претпазливата монетарна политика што ја спроведува Народната банка придонесува за ефективно управување со ризиците и за постепено намалување на инфлацијата, при што се создаваат услови за стабилен економски раст, што се потврдува и со најновите проекции на ММФ за македонската економија, со очекуван раст од 3,4% годинава, а за следните години се очекува дека нивото ќе се задржи околу 3%. Истовремено, се очекува натамошно забавување на инфлацијата по што би се свела на историското ниво од околу 2% на среден рок.
Во разговорите била потврдена и постојаната успешна соработка меѓу Народната банка и ММФ.
„Во изминатиот период, преку техничките мисии на ММФ беа остварени повеќе активности за модернизација на монетарните операции, подобрување на проекциите за ликвидноста на банкарскиот систем и за зајакнување на супервизорските капацитети на Народната банка. Со тоа се зголемија ефикасноста и предвидливоста во спроведувањето на монетарната политика, како и отпорноста на банкарскиот систем на потенцијални ризици. Соработката со ММФ ќе продолжи и во наредниот период, заради понатамошно усогласување со меѓународните стандарди и за унапредување на аналитичките и оперативните капацитети на Народната банка, се вели во соопштението на Народна банка.
