Со 2,62 промили алкохол во крвта, жител на Дреново возел на регионалниот пат Кавадарци – Возарци и излетал од патот.
Вчера во 16:30 часот на регионалниот пат Кавадарци-село Возарци, кај место викано „Рамниште“, полициски службеници од ОВР – Кавадарци го лишиле од слобода В.А., на возраст од 65 години од село Дреново, кавадаречко, кој околу 15:20 часот, управувајќи патничко возило „фолксваген голф“ со прилепски регистарски ознаки, излетал од патот, соопштија од Секторот за внатрешни работи – Велес.
По преземени мерки било констатирано дека е под дејство на алкохол, односно дека има 2,62 промили алкохол во крвта.
Лицето е задржано во полициска станица и по целосно документирање на настанот, против него ќе биде поднесена пријава по член 297-а од Кривичниот законик – „безобѕирно управување со моторно возило“, истакнаа од СВР – Велес.
