На Плоштад Никола Пашиќ денеска продолжи собирањето потписи за распишување вонредни парламентарни избори, во организација на иницијативата ИТ Блокада, со поддршка од Студентите во блокада и други граѓански и невладини организации.
Настанот под наслов „Заедно за студентите“ собра неколку стотини граѓани и беше организиран по повод една година поддршка од дел од ИТ-заедницата за студентските блокади и протести.
Во рамки на собирот беа поставени штандови на граѓански организации, на кои беа изложени домашни производи, маици, свирчиња и кутии за донации. На плоштадот беше истакнат и транспарент со пораката „ИТ БЛОКАДА – Година помина, ден никогаш“.
За разлика од претходни протести, на денешниот настан не беа предвидени говори. Наместо тоа, беше реализирана програмата „Култура во центарот“, која вклучуваше читање поезија и проза, како и музички содржини.
Организаторите најавија дека собирањето потписи ќе продолжи и во наредниот период, сè додека не се собере потребниот број за официјално поднесување на барањето за распишување вонредни избори.
