Поранешната претседателка на Државната комисија за спречување на корупцијата (ДКСК), Татјана Димитровска, денеска пред судот рече дека ја разбира содржината и не го признава делото и не се чувствува виновна за кривичното дело за кое се товари – одавање службена тајна и компјутерски фалсификат.
„Сметам дека не сум сторила ништо за што сум обвинета“,рече Димитровска.
Димитровска при произнесувањето пред судот рече дека сега е вработена во Државниот завод за ревизија како помошник на државниот главен ревизор.
Димитровска е обвинета за две кривични дела – одавање службена тајна на поранешниот директор на ТЕЦ „Неготино“, Небојша Стојановиќ, обвинет во предметот „Адитив“, како и за компјутерски фалсификат, односно дека ревизорот Миле Столевски во нејзино име го полагал тестот за добивање безбедносен сертификат за пристап до класифицирани информации.
Покрај Димитровска, на обвинителната клупа седнаа и ревизорот Столевски, како и Билјана Петровска-Мантева, која се товари за одавање службена тајна.
Билјана Петровска-Мантева, сега вработена во АД „Електрани на Македонија“, подружница ТЕЦ „Неготино“, како самостоен референт за плаќање на денешното судење рече дека го разбира обвинителниот предлог и дека не се чувствува виновна за делото што ѝ се става на товар.
Миле Столевски, вработен во Државниот завод за ревизија како виш ревизор, изјави дека го разбира обвинителниот предлог и дека не се чувствува виновен за кривичното дело што му се става на товар.
По произнесувањето вина, Јавното обвинителство продолжи со изведување материјални докази читајќи и презентирајќи потврди за извршени претреси и одземени предмети кај обвинетите.
На почетокот на денешното рочиште одбраната на Татјана Димитровска, адвокатот Владимир Туфегџиќ се произнесе по доставен поднесок до судот, со кој, како што рече, одбраната на Татјана Димитровска бара јавниот обвинител да го повлече обвинението од причина што по доставената листа на докази, одбраната се обратила со барање до ДКСК да се произнесе по четирите предмети по кои се товари Татјана и е доставено известување дека седниците се пренесувани јавно и се достапни и во овој момент и на нив биле елаборирани сите документи и докази што Јавното обвинителство ѝ ги става на товар на обвинетата за оддавање државна тајна.
„Ниеден документ, кој бил предмет на расправа на јавна седница, немал класификација службена тајна“,рече Туфегџиќ.
Обвинетата, како што рече Туфегџиќ, не оспорува дека имало комуникација со Миле, а таа била во насока на пополнување на апликацијата што ѝ се става на товар. Одбраната, нагласи Туфегџиќ, смета дека нема елементи на кривично дело зашто тоа не е забрането по закон, ниту е јасно дефинирано пополнувањето на апликацијата.
Јавната обвинителка Наташа Поп-Трајкова, по ова, го замоли судот да укаже на одбраната дека е недозволено да се упатуваат коментари кон Јавното обвинителство пред излагањето на јавниот обвинител по листата на докази.
„Од тие причини ЈО го задржува правото да се произнесе по листата на докази доставени од одбраната во моментот кога одбраната ќе почне со изведување на доказите и Обвинителството ќе се произнесе по неа по предложените докази. Сметам дека судот треба да продолжи со постапката на произнесување по обвинителниот предлог“,изјави Наташа Поп-Трајкова.
Следното рочиште за случајот е закажано за 16 април.
