Една третина од жителите на Германија се загрижени дека ќе ја изгубат работата поради експанзијата на вештачката интелигенција (ВИ), покажаа резултатите од анкетата нарачана од агенцијата ДПА.
Спроведена од институтот за анкети YouGov, анкетата врз 2.175 лица покажа дека 34% од испитаниците се загрижени за нивниот работен статус поради ВИ, додека 62% не се чувствуваат загрозени.
Иако не се забележани значајни разлики меѓу поддржувачите на различните политички партии во земјата, работниците што живеат во урбаните средини и оние со ниско ниво на образование повеќе се плашат дека ќе бидат заменети од вештачката интелигенција во иднина.
Според анкета објавена од Институтот Ифо објавена во јуни, околу 27% од компаниите во Германија претпоставуваат дека вештачката интелигенција ќе доведе до губење на работни места во следните пет години.
Околу 5% од компаниите очекуваат дополнителни работни места како резултат на вештачката интелигенција, додека две третини не очекуваат никаква промена.
Откако американската компанија OpenAI го објави својот прв голем јазичен модел, ChatGPT, во ноември 2022 година, развојот на моделите со вештачка интелигенција постигнаа огромен напредок. Бранот модели со вештачка интелигенција што оттогаш ги создадоа разни компании се подобри во однос на логиката, ефикасноста, скалабилноста и истовремената обработка на текст, слики, аудио, видео и други формати.
