Српското Министерство за внатрешни работи соопшти дека при редовното сортирање на поштата во зградата на Владата е откриен плик адресиран до вицепремиерот и министер за внатрешни работи Ивица Дачиќ, во кој имало три куршуми. Рендгенската проверка ја открила содржината, по што бил активиран безбедносен протокол.
Истрагата утврдила дека пратката била предадена на 26 август во канцеларија на „Пошта Србије“ во Пожаревац. Полицијата го идентификувала и пронашла лицето што го оставило ковертот; за околностите и мотивите се води понатамошна постапка.
МВР на Србија наведе дека презема сите мерки пропишани со закон за заштита на граѓаните и државните институции. Предметот е обезбеден, а надлежните служби ги проверуваат сите материјални траги и можни поврзаности со други случаи.
