Словачка ќе го блокира секој обид за воведување санкции од Европската унија врз Русија, изјави денеска словачкиот премиер Роберт Фицо откако парламентот на земјата усвои резолуција со која се бара од владата да не поддржува никакви нови казнени мерки против Москва.
Фицо додаде дека Словачка сака да остане конструктивна во рамките на ЕУ, но во исто време рече дека резолуцијата на парламентот е политички инструмент што носи силна порака.
Доколку има санкции што ќе ни наштетат, никогаш нема да гласам за нив, рече тој на прес-конференција.
Словачка, членка на НАТО и ЕУ, се разиде со своите западни сојузници во врска со нејзината позиција за Украина откако Фицо и неговата левичарска националистичка коалициска влада дојдоа на власт.
Братислава престана да испорачува државна воена помош за Киев во војната со Русија.
