Потпретседателката на СДСМ, Ана Чупеска, во гостување на подкастот „Претрес“ зборуваше за подготовките на партијата за претстојните локални избори, потенцијалните коалициски партнери, како и за лидерот на СДСМ, Венко Филипче.
На прашањето дали Демократската унија за интеграција (ДУИ) е дел од потенцијалниот коалициски спектар, Чупеска не ја исклучи таа можност, но нагласи дека не се работи за исклучок, туку за поширок пристап кон сите партии со кои може да се воспостави принципиелен однос.
„Ние сме спремни (да одиме во коалиција) со сите политички партии, вклучувајќи ги и ДУИ, доколку имаме принципиелен однос на почит“, изјави Чупеска. Таа додаде дека досега не постојат никакви разговори или контакти со ДУИ или нејзиниот лидер Али Ахмети. „Ништо такво не се случува“, рече таа.
Чупеска говореше и за претседателот на СДСМ, Венко Филипче, за кого истакна дека има изразени лидерски способности.
„Јас гледам, во работата со претседателот Филипче, навистина има лидерски способности, иако тој се чини тивок. Таа негова тивкост не го онеспособува во лидерството, напротив – има исклучително длабока и голема мудрост којашто му дава можност за многу брзо и точно и исправни одлуки да донесува“, изјави Чупеска, нарекувајќи го Филипче „шеф“.
На прашањето кој е подобар политичар – Венко Филипче или Зоран Заев – таа даде дипломатски одговор:
„И двајцата се добри, ама на различен начин.“
