17 годишниот светски фудбалски бисер Ламин Јамал го продолжи договорот со шпанскиот шампион Барселона до 2031 година, соопштија од клубот од Ноу Камп.
„Фудбалскиот клуб Барселона и Ламин Јамал постигнаа договор за продолжување на договорот, кој ќе го обврзе со клубот до 30 јуни 2031 година“, се вели во соопштението на Барселона, актуелниот шампион на Шпанија.
Јамал дебитираше за Барселона на 29 април 2023 година против Бетис, во победата од 4-0 во Ла Лига. Тогаш имаше само 15 години и 290 дена, со што стана најмладиот дебитант во историјата на Барселона во шпанското првенство.
Според шпанските медиуми, Јамал ќе заработува 20 милиони евра по сезона, со нешто помалку од 10 милиони евра бонуси за обновување секоја година, што е драматично зголемување во однос на 1,6 милиони евра колку што добиваше досега.
Со овој договор, Јамал станува третиот најплатен играч во тимот, зад Френки де Јонг (23 милиони евра нето) и Роберт Левандовски (25 милиони евра нето).
