Американскиот претседател Доналд Трамп вчера потпиша извршна наредба за намалување на царините за увоз на јапонски автомобили и други производи, во однос на стапките од јули годинава, обезбедувајќи олеснување за извозно ориентираната економија на Јапонија, објави Ројтерс.
Договорот меѓу САД и Јапонија, постигнат по неколкумесечни преговори, ја намалува неизвесноста за јапонскиот автомобилски сектор и потврдува јапонски инвестиции од 550 милијарди долари во американски проекти.
Царините за јапонските автомобили се намалуваат од 27,5% на 15% и ќе стапат во сила седум дена по објавувањето на наредбата. Производите со повисоки царини од 15% нема да бидат дополнително оптоварени, додека оние со пониски стапки ќе се усогласат на 15%, со ретроактивно важење од 7 август.
Трамп ветил и ослободување од царини за комерцијални авиони и делови.
Царините на Трамп го намалија јапонскиот извоз, силно погодувајќи ги производителите на автомобили. „Тојота“ минатиот месец соопшти за очекувана загуба од речиси 10 милијарди долари.
– Конечно, напиша Рјосеи Аказава, главниот трговски преговарач на Јапонија, на „Икс“, по повеќемесечните фрустрирачки преговори. Аказава, на своето десетто патување во САД, изјави пред новинарите во Вашингтон дека Јапонија ја поздравува наредбата како „стабилно спроведување на договорот постигнат на 22 јули“.
Јужна Кореја, конкурент на Јапонија во автомобилскиот извоз, сè уште чека сличен договор со САД за царини од 15% за „Хјундаи“ и „Киа“, кои сега се под 15% царини. Јужнокорејскиот трговски претставник рече дека земјата го проценува влијанието на јапонската наредба.
Акциите на јапонските автомобилски компании малку пораснаа во петокот на берзата, додека корејските забележаа благ пад.
