Американскиот потпретседател Џеј Ди Венс изјави дека новите царини што ги објави Доналд Трамп се „голема промена“, но и неопходен пресврт за американската економија.
– Се задолжуваме кај кинеските земјоделци за да го купиме она што истите тие фармери го произведуваат. Тоа не е рецепт за просперитет, ниски цени, ниту добри работни места во Америка, изјави Венс за Фокс њуз, критикувајќи го моделот на глобалистичка економија за кој тој тврди дека ги довел САД до голем долг и зависност од странско производство.
– Во моментов, претседателот Трамп ја води економијата во друга насока, на тоа ја засноваше кампањата, тоа е она што го вети и сега го исполнува. Да, ова е голема промена, нема да кријам. Но, нам ни требаше голема промена, додаде тој.
Венс истакна дека администрацијата „напорно работи“ на намалување на цените, но предупреди дека промените нема да се случат преку ноќ. Тој исто така рече дека високите цени ќе бидат резултат на инфлацијата од мандатот на Бајден, а не на постапките на Трамп.
За најавените даночни намалувања рече дека не ги гледа како компензација за царините, туку како дел од „тотален пресврт“ што ќе ги награди американските работници и компании.
– Пораснав во семејство кое често живееше од плата до плата и знам дека многу Американци се плашат од зголемените трошоци за живот. Ние се бориме да го промениме тоа, заклучил тој.
