Вкупно 29 интернет портали досега се пријавиле во Регистарот на издавачи на онлајн медиуми – интернет портали при Агенцијата за аудио и аудиовизуелни медиумски услуги (АВМУ), откако неодамнешните измени во Законот за медиуми за првпат ги признаа како медиуми. Оваа бројка претставува само околу 10 отсто од вкупниот број на портали кои се пријавија за добивање државни средства за рекламирање на политичките партии за време на последните парламентарни избори.
За споредба, за парламентарните избори во 2024 година, во Државната изборна комисија (ДИК) се пријавиле рекордни 249 онлајн-медиуми за платено политичко рекламирање, додека за изборите во 2020 година тој број изнесуваше 235. За изборната кампања во 2024 година, на 16 учесници на изборите им беа исплатени вкупно 3.979.984 евра за политичко рекламирање, од кои 25 отсто беа наменети за порталите, со максимален износ од 15.000 евра по портал.
Сепак, овие законски измени не влијаат на правилата за политичко рекламирање за време на избори, бидејќи за тоа се неопходни и измени на Изборниот законик, а до распишувањето на локалните избори останува помалку од еден месец. По последните избори, и ДИК и АВМУ рекоа дека не се надлежни да проверуваат кој сѐ аплицира за средства за рекламирање во изборна кампања.
Државниот завод за ревизија, во својот извештај за парламентарните избори во 2024 година, укажа на потребата од доуредување на Изборниот законик. Ревизорите препорачуваат да се дефинираат јасни критериуми кои електронските медиуми треба да ги исполнат за да можат да аплицираат за политичко рекламирање, како и прецизни правила за распределба на буџетските средства. Исто така, се бара да се определи надлежен орган за следење на изборното медиумско претставување на интернет порталите.
Според новите одредби во Законот за медиуми, за да се регистрираат, порталите мораат да имаат регистрирана дејност во Централниот регистар, седиште и уредништво во Македонија, како и регистриран македонски домен (.мк или .мкд). Дополнително, задолжително е да имаат најмалку двајца вработени со полно работно време, или, по исклучок, еден вработен и еден со договор на дело. Овие услови не се потребни при пријавувањето во ДИК за добивање средства за платено политичко рекламирање.
Регистрираните портали сега имаат обврска еднаш годишно до АВМУ да доставуваат извештаи за сопственичката и уредничката структура, за приходите и расходите, како и за бројот на вработени.
