Пукање во Батинци го потресе Скопје утрово, а 49-годишен маж, припадник на АРМ, бил донесен во Градската болница без знаци на живот, со две прострелни рани во пределот на градниот кош.
Како што информираат од Градската болница „Св. Наум Охридски“, жртвата била донесена околу 10:55 часот.
„Веднаш беа преземени мерки за реанимација, но пациентот беше веќе мртов. Констатиравме смрт на лице место“, соопштија од болницата.
Иако официјално надлежните сè уште не го соопштуваат идентитетот, дел од медиумите објавија дека станува збор за Агим Муареми, жител на Батинци и припадник на АРМ.
Мотивите и околностите околу пукањето сè уште не се познати, но истрагата е во тек. На местото на настанот извршен е увид, а осомничениот за нападот е во бегство.
Претходно од Министерството за внатрешни работи ја потврдија информацијата за пукањето во Батинци и соопштија детали.
„Денеска (11.07.2025) околу 10:15 часот во СВР Скопје, лицето М.Е. пријавил дека на влезот на село Батинци, скопско, лицето М.Џ. пукал со огнено оружје кон патничко возило ‘Киа’ кое било во движење. А.М. (50) се здобил со прострелни рани во пределот на градниот кош и бил пренесен во ГОБ ‘Св. Наум Охридски’, каде во 11:00 часот од страна на доктор била констатирана смрт“, информираа од МВР.
