Системот ЕТИАС нема да биде имплементиран во првата половина на 2025 година, покажуваат новите информации објавени на официјалната веб-страница на Европската унија.
Неговата имплементација, која неколку пати се одложува, беше најавена за мај 2025 година, но ЕУ сега обезбеди нови информации за модернизираниот систем за патување.
ETIAS во моментов не е оперативен и нема да започне во првата половина на 2025 година. Во моментов, на патниците не им требаат новите процедури кои беа најавени. Европската унија ќе го објави почетокот на ETIAS неколку месеци пред неговото лансирање, се наведува на официјалната веб-страница.
Со ЕТИАС системот е предвидено државјаните на земјите кои не се дел од Европската унија да аплицираат онлајн за влез во зоната. Според досегашните најави, барањето за влез, во кое патникот ќе мора да наведе низа детални информации за себе и намената за која патува, ќе се наплаќа 7 евра и доколку е прифатено, ќе важи три години.
