„Македонски семејни винарии” го најавија Денот на станушината, информирајќи дека станува збор за најголемиот вински настан на ова здружение, на кој ќе се дегустира единствената македонска автохтона сорта, а ќе има и предавања од еминентни домашни и светски познавачи на виното, дегустација на над 35 различни етикети на вино со добра музика и македонска храна.
Со законските олеснувања од пред пет години, како и со грантовите за поддршка на фамилијарните бизниси во лозаропроизводството, расте бројот на малите семејни винарии, како македонски вински амбасадори во светот, информираа од здружението со седиште во Кавадарци.
Притоа се осврнаа и на многубројните награди за квалитет што ги освојуваат винариите членки на здружението, во земјава и надвор од неа.
Манифестацијата ќе се одржи на 10 мај во Кавадарци и на 11 мај во Скопје.
Станува збор за единствената автохтона македонска сорта на грозје. Нашето македонско девојче, како што сите ние го нарекуваме, сакаме да го издигнеме на едно повисоко и достоинствено ниво, нагласија од здружението.
Притоа беа децидни дека иако оваа сорта на грозје е малку застапена, со децении назад од неа се прави квалитетно вино.
-Во рамките на здружението, има семејни винарии што ја негуваат оваа сорта. Од страна на семејните винарии, виното од автохтоната сорта се продава под различни имиња, информираа од здружението.
