Извршниот директор на „Ер Индија“, Кембал Вилсон изјави дека има преживеани патници од денешната авионска несреќа.
– Повредените патници се хоспитализирани во локалните болници. Засега нема точни податоци колку патници преживеале, објави Вилсон на Икс.
И началникот на полицијата во Ахмедабад, Гјанандер Синг Малик изјави дека има преживеани и оти спасувачките служби го пребаруваат теренот.
Британскиот државјанин со индиско потекло Вишваш Кумар Рамеш ја преживеа авионската несреќа. Тој за индиските медиуми изјави дека проблемите почнале 30 секунди по полетувањето.
– Кога станав, телата беа насекаде околу мене. Се исплашив. Станав и истрчав. Делови од авионот беа насекаде околу мене. Некој ме зграпчи, ме стави во амбулантно возило и ме однесе во болница, наведе Рамеш.
Тој за Лондон патувал со својот брат Аџај, кој најверојатно не ја преживеал несреќата.
Авионот Боинг 787-8 на „Ер Индија“ кој полета од Ахмедабад за Лондон, се урна врз објект на Медицинскиот колеџ и Цивилната болница во Ахмедабад. Најмалку пет студенти по медицина загинаа откако авионот се урна студентскиот дом на Медицинскиот колеџ.
Федерацијата на сите индиски медицински здруженија (ФАИМА) соопшти дека од 50 до 60 студенти по медицина се хоспитализирани по авионската несреќа.
Федерацијата соопшти дека пет студенти се водат како исчезнати, а најмалку двајца се на одделението за интензивна нега. Исчезнати се и некои членови на семејството на лекарите. Според ФАИМА, повеќето од патниците во авионот биле пренесени во болница без знаци на живот.
Првично беше соопштено дека во авионот имало 232 патници и 12 члена на екипажот, за подоцна индиските медиуми да јават дека за Лондон патувале 230 лица.
Досега е потврдено дека при падот на авионот загинале 133 луѓе
