С Македонија самата се блокира на патот кон Европската Унија, зашто не е подготвена да ги исполни критериумите за членство, изјави бугарскиот претседател Румен Радев за време на неговата посета на Хрватска, каде што се сретна со хрватскиот претседател Зоран Милановиќ, пренесува бугарската новинска агенција БТА.
Во изјавата дадена на заедничка прес-конференција со Милановиќ, Радев е категоричен дека Бугарија не ја запира С Македонија на патот кон ЕУ и не поставува никакви нови услови освен оние што веќе се договорени.
„Инсистираме да се почитува сè што е договорено“,кажа бугарскиот претседател.
Бугарскиот претседател во Загреб посочи и дека Бугарија нема да се откаже од заштитата на правата на Бугарите во Р Македонија.
„Сè уште чекаме РСМ да го исполни јасно напишаниот услов кој би отворил врата за почеток на преговори. А тоа е гарантирање на рамноправноста на Бугарите во земјата преку нивно вклучување во Уставот. Тоа е она што го сакаме. Кон нашите соседи гледаме конструктивно и добронамерно и покрај нивниот постојан провокативен, па дури и навредлив речник кон нас. Правиме сè што е можно за да ги исполнат критериумите и условите што се усвоени и евидентирани“,вели тој.
Според него, постои јасен консензус, усвоен во јули 2022 година, и од бугарската и од Владата на РСМ, како и од сите земји членки на ЕУ.
Претседателот ја истакна важноста на одлуката на бугарскиот парламент поврзана со напредокот на С Македонија, како и писмото до раководителите на европските институции и земјите-членки на ЕУ што го испрати кон крајот на јуни.
„Бугарија не наметнува никакви дополнителни услови. Нема да се откажеме од заштитата на правата на Бугарите во РСМ“,вели бугарскиот претседател.
Минатата недела шефот на бугарската дипломатија Георг Георгиев го нарече премиерот Христијан Мицкоски „северномакедонски“ премиер.
Мицкоски, пак, реагирајќи на епитетот „северномакедонски“ премиер, рече дека на Георгиев му дале задача да се задева исто како глушецот со лавот.
Бугарскиот премиер Росен Жељазков го повика својот македонски колега Христијан Мицкоски да најде начин и да ѝ се извини на Бугарија за изјавата со лавот и глушецот.
Претходно осуда за изјавата на Мицкоски стигна и од Министерството за надворешни работи на Бугарија.
