Можам да ветам дека се што ќе правиме, ќе правиме транспарентно, нема да работам во интерес на поединци, рече кандидатот за градоначалник на Карпош од ВМРО-ДПМНЕ Сотир Лукровски на денешната средба со новинарите.
Тој, како што кажа, е роден во Карпош и веќе 52 години е дел од оваа Општина. Рече дека не ветува невозможни работи, туку секојдневна работа, увид на проблемите на терен, директен контакт со граѓаните, кои за него се еднакви без разлика на националната, верска и друга припадност.
Под слоганот „Со љубов“ за Карпош, Лукровски на брифингот со новинарите претстави проектен план за Општината што опфаќа 12 точки, меѓу кои стопирање на бетонизацијата, чист и зелен Карпош, побезбедна населба, решавање на сообраќајниот хаос, дигитализација на општината, поинклузивна општина, унапредување на спортските активности и континуирано вложување во образованието.
Доколку ја добие довербата на граѓаните најпрво ќе се фокусира на неколку работи, меѓу кои решавање на проблемот со паркинг просторот, одржувањето на урбаната опрема и проблемот со сметот.
-Паркинг просторот на територијата на Карпош што ги засега сите граѓани, сметот, подобро организирано негово собирање, одржување на урбаната опрема – канделабри, клупи, осветлување, ревитализација на убавите паркови во Карпош, истакна Лукровски.
Тој посочи дека планираат да ги решат барањата за легализации на објекти, и оти ќе си дадат рок од две и пол години да ги решат над 11.000 барања за легализации.
-Тоа ни е определбата како што напоменав преку создавање јавно претпријате „Карпош план“. Да не шпекулирам со бројка отприка има 11-12.000 поднесоци. Во Бардовци има барања дури и од 2011 година. Без разлика дали ќе биде одговорено позитивно или негативно во следните две години определба ќе ни биде да ги завршиме барањата за легализација, затоа што само со решени легализации ќе носиме правилни ДУП-ови и понатаму, нагласи Лукровски.
Истакна дека преку претпријатието „Карпош план“ ќе се придонесе за носење ДУП-ови кои ќе бидат издржани и во интерес на граѓаните и во кои ќе бидат опфатени сите содржини за домување.
-И сето тоа ќе биде транспарентно, инклузивно, во соработка со граѓаните. Сепак сме ние сите соседи. Имаме потреба од паркови, имаме псостор, имаме државно земјиште по течението на Вардар. Моја лична определба како човек и татко на три деца во оваа Општина сметам дека треба да поработиме на нови паркови затоа што граѓаните веќе 30 години ги слушаат парковите во Карпош. Да не заборавиме дека и добар дел од Градскиот парк е во нашата општина и тука ни се заеднички ингерециите и со градот и со една добра соработка со градот да го живнеме и Градскиот парк, истакна тој.
Лукровски планира да вложува во образованието, при што во неговиот проектен план се предвидени и 200 нови места во градинките, униформи за сите основни училишта како и реновирање на училиштата по план за обнова.
Во однос на спортот во Општината, Лукровски на брифингот рече дека планира да го зголеми финансирањето на постоечките клубови, отворање на мега забавен парк со картинг патека, изградба на нови велосипедски патеки. Во однос на спортската сала „Партизан“ кажа дека таа че биде во функција на граѓаните и на учениците.
Најави и субвенции за млади, субвенции за ранливи категории пензионери, субвенции за социјални активности. Во овој дел во неговата програма е вклучено и субвенции за секоја зграда – задолжителна обнова на лифтовите и обнова на фасадите. Планирано е и формирање функционална шинтерска служба и општински стационар.
За решавање на паркинг просторот – во неговата програма е планирано 500 нови паркинг места преку монтажни катни гаражи со фотоволтаици на кровната површина, како и едонасочни улици како решение за зголемената безбедност.
Лукровски во однос на културните активности во Општината посочи дека плнаира мурали во секое маало, како и културна програма цела година – концетри, претстави, стенд ап комедии.
