За неколку месеци односно на почетокот на идната година Македонија нема да плаќа роаминг со членките на ЕУ.
Ова е најавата која што доаѓа од Брисел каде министерот за надворешни работи Тимчо Муцунски разговарал и на оваа тема со претставници на Европската Унија.
,,Денес во Брисел се сретнав со Герт Јан Купман, генерален директор за проширување и соседство во Европската комисија.
Разговаравме за постепеното укинување на трошоците за роаминг помеѓу Западен Балкон и ЕУ – одлуката се очекува почетокот на следната година”, објави Муцунски синоќа.
Македонскиот министер на домаќинот во Брисел му ја потврдил посветеноста на Владата на реформите и поддршката од ЕУ преку Планот за раст.
Во Брисел Муцунски порачал дека членството во ЕУ останува клучен стратешки приоритет на македонската надворешната политика.
Укинувањето на роаминг за телефонски разговори и интернет со земјите членки на ЕУ може да заштеди десетици милиони евра за македонските граѓани, компании и институции.
